Ginpahayag sang anay chief prosecutor sa impeachment trial batok kay former Chief Justice Renato Corona nga matayog ang timeline nga ginhatag ni Senate President Francis “Chiz” Escudero nga mahimo suguran ang impeachment trial batok kay Vice President Sara Duterte sa Hulyo 30.
Sa interview sang Bombo Radyo Bacolod kay former Iloilo 5th District Representative Niel “Junjun” Tupas, kada tatlo ka tuig, nagabag-o ang mga miyembro sang lower kag upper house.
Kadungan sini, tanan nga proceedings ang automatic man nga madismiss ukon iterminate.
Gani sa pagtakop sang 19th Congress sa Hunyo 30 kag pagsaylo sa 20th Congress, indi na mapatabok ang impeachment trial batok kay Vice President Sara Duterte.
Suno diri, ang mga materminate nga proceedings ang ginarefile na lamang sa bag-o nga kongreso, nga indi mahimo sa impeachment trial bangod sa one-year bar rule.
Paathag sang anay kongresista nga kun malab-utan sang pagtakop sang 19th Congress kag indi madesisyunan ang impeachment complaint, sila ang liwat nga makafile makaligad pa sang isa ka tuig, gani indi matabo ang impeachment trial sa timeline ni Escudero nga Hulyo 30.
Pahanumdom ni Tupas nga ini ang indi kaangay sa Korte Suprema nga bisan magretiro ang hukom, sarang lamang mapadayun sang masunod nga hukom ang kaso, bangod may separado nga proseso ang impeachment.
Ini man ang rasun nga may mandate nga sa pagfile sang impeachment complaint, may timeline nga dapat masumiter na gilayon sang House secretary general sa House Speaker, kag urgency sa pagconvene sang Senado bilang impeachment court agud ini ang gilayon madisisyunan.
Dugang pa sini nga indi man abogado ang tanan sa mga Senador kag iban sa mga ini ang action star.
Suno kay Tupas, matapos ang May 12 Midterm Elections, pila sa mga House prosecutor ang mahimo indi magdaog, kasubong man sa mga Senador nga magaserbe nga hukom.
Kun pahanugutan ang cross-over, indi man mahimo nga lain nga Senador ang naghearing, lain man nga Senador ang magadesisyon.
Nagapati si Tupas nga kun icross-over ang impeachment complaint, ini ang segurado nga icontest sang kampo ni VP Sara.
