Patay ang chief tanod sa Barangay Camindangan Proper, Sipalay City matapos ginluthang sang wala pa matumod nga mga suspetsado.
Ang biktima ang ginkilala nga si Donie Baculi, 38 anyos.
Pahayag sang asawa nga ginbiyaan sini ang iya nga bana sa ila baligyaan sang isda bangod ini ang may baklon sa malapit lamang nga tyangge.
Apang hinali na lamang ini nakabati sang madamo nga lupok sang armas-luthang.
Nakibot na lamang ini sang makabalik nga makita ang iya bana nga nagakayaon na kag nagapaligo sa kaugalingon nga dugo.
Wala naman sang may nakatumod kun sin-o ang may kahimuan sa krimen.
Pahayag sang asawa nga wala man ini sang nahibaluan nga may kontra ang iya bana kag ini ang wala man nakabatun sang pagpamahog.
Sa karun padayun pa ang imbestigasyon sang Sipalay City Police Station sa insidente.
Sa interview sang Bombo Radyo Bacolod kay Police Lt. Col. Fernando Somblingo, acting chief of police sa Sipalay City Police Station, kilala man sini bilang maayo nga persona ang chief tanod.
Aminado ini nga sa karun indi pa nila matumod ang motibo sa krimen, kag padayun pa ang ila follow-up investigation.
Nahibaluan nga sang Abril 24 lamang, ginpatay man ang Purok President sa Sitio Cagay, Barangay Camindangan nga si Jun Michael Jabagat sang mga wala matumod nga mga persona.
Paathag ni Somblingo nga indi pa sini masiling kun katapo sang New Peope’s Army (NPA) ang nagpatay diri bangod may-ara man sang presensya sang militar sa lugar.
Apang isa man sa ginalantaw nga motibo ang may kaangtanan sa kaangtanan sini sa isa ka construction firm.
