Nagpasalig ang China sa European Union sang Biyernes nga igaduso sini ang kalinong sa Ukraine apang sa ila kaugalingon nga pamaagi.
Sa summit nga ginpatigayon sa tunga sang European Union kag China, ginpahayag ni Chinese Premier Li Keqiang nga igaduos sang Beijing ang kalinong sa kaugalingon sini nga pamaagi, samtang ginpahayag ni President Xi Jinping nga nagalaom ini nga pagatrataron sang EU ang China nga independent.
Nagpanawagan naman si European Council President Charles Michel sa China nga magbulig sa pagpauntat sang gyera sa Ukraine kag indi magpabulag-bulagan sa bayolasyon sang Russia sa international law.
Suno diri, ang maskin ano nga attempts nga magpugong sang sanctions ukon maghatag sang bulig sa Russia ang magapalawig lamang sa gyera.
Nahibaluan nga ang China ang nagaduso sang mas malapit nga energy, trade kag security ties kaupod ang Moscow kag ginabutang ang iya kaugalingon bilang global force nga makatindog batok sa Estados Unidos.
Ginhambalan ni Li ang mga EU leaders nga ang China ang madugay na nga nagaduso sang kalinong kag nagapromote sang mga negosasyon kag handa nga magpadayon sa constructive role sini kaupod ang international community.
Suno kay Michel, nahisugtan sang duha ka bahin nga ang gyera, nga ginatawag sang Russia nga isa ka “special military operation”, ang isa ka pagpamahog sa global security kag global economy.
