Magapabilin nga Special Non-Working Holiday sa syudad sang Bacolod ang Pebrero 1, kun sa diin ginaselebrar ang Bacolaodiat Festival kadungan sang Chinese New Year.
Aminado si Bacolod City Mayor Evelio “Bing” Leonardia, nga malapit sa tagipusuon sini ang Bacolaodiat bangod iya ini personal nga ideya nga nag-umpisa sang 2006.
Ang aktibidad ang nagmadinalag-on kun sa diin bukas nga naghugpong ang mga nagkalainlain nga organisasyon sang Bacolod-Chinese Community.
Pahayag pa sini nga ang selebrasyon sang Bacoladiat Festival ang halos kaangay na sa pagselebrar sang Maskara Festival.
Apang subong nga tuig, liwat nga patigayunon ang Bacolaodiat Festival nga wala sang aktibidad.
Nagtawag nalang ang mga Filipino-Chinese Community sang organizer nga nagbutang sang imahe sang tigre sa Bacolod City Government Center (BCGC) bilang pahanumdom sang Chinese New Year.
Gindumdom man sang alkalde nga sadto, nagakapuno ang New Government Center (NGC) sa tion sang Bacolaodiat ilabi na sa gab-i kun sa diin may fireworks display.
Nagaplano pa kuntani si Leonardia nga magbutang sang kalingawan sa NGC, apang nagbag-o ang pinsar sini sa kahangawa nga magdugok ang tawo sa lugar.
Panindugan sini nga bisan wala sang selebrasyon, ang labi nga importante amo nga yara ang espirito sang selebrasyon.
Dugang pa sang alkalde nga ang okasyon ang lima naman ka tuig nga ginhemo sang gobyerno bilang opisyal nga Special Non-Working Holiday.
