Tuman ang kalipay sang graduate sang Carlos Hilado Memorial State University-Talisay City Campus nga nakapasar ini sa Licensure Examination for Teacher-Secondary Education kag nadala pa sa Top Notchers.
Sa interview sang Bombo Radyo Bacolod kay Maria Carmela Delada, Rank 4 sa March 2025 Licensure Examination for Teachers-Secondary Education, wala ini magdahom nga madala sa Top Notchers.
Suno kay Delada, sang nagkuha sila sang pasinawan ang goal lamang nila amo nga makapasar apang nakibot ini nga nangin Rank 4 siya.
Suno diri, nagabiyahe siya sang nagwa ang resulta kag indi pa ini makapati nga nagrank 4 siya sang ini ang gintawgan nga nagapangayo sang picture agud nga ipost sa social media nga siya ang passer kag nadala sa Topnotchers.
Una nga reaksyon sini sang nahibaluan nga siya ang nakapasar amo nga naghibi bangud sa pagpasalamat kag naoverwhelm man ini.
Ang iloy sini ang isa man ka manunudlo kag ang amay sini ang mechanic samtang sila ang apat ka mag-ululutod kun sa diin siya ang ikaduha.
Health Allied ang ginkuha sini sang Senior High School kag wala nagsulod sa paminsaron sini nga mangin manunudlo apang sang nagpandemic nahadlok na ini sa mga exposures.
Bangud sini nadesisyunan niya nga magatudlo apang magamit man sini ang mga natun-an sang Senior High School.
Samtang ang una nga duha ka tuig sa college ang online bangud pandemic time pa sadto kag kag ang 3rd kag 4th year ang may face to face na kag may blended learning man sa gihapon.
Nagtutom man ini sa pagtuon kag pagreview bangud sa tinutuyo nga makapasar sa board exam.
Si Delada ang honor role humalin sang Elementary, High School, Senior High School kag Cum Laude sang naggraduate sa kolehiyo.
Nagapati ini nga ang Carlos Hilado Memorial State University-Talisay City Campus ang may yara sang dekalibre nga mga manunudlo gani maayo man ang mga produkto sini.
Panugyan ni Delada, indi lang dapat maalam kundi dapat magfocus gid kag may pagpaninguha agud nga makuha kag malab-ot ang handom sa kabuhi.
Ginpasalamatan sini ang tanan nga nangin kabahin sang iya journey humalin sa pagtuon, pagreview tubtob sa pagpasar sa licensure examination.
