BACOLOD CITY — Magluwas sa dengue, may iban pa nga masakit nga nagadapo sa pumuluyo subong nga tig-ululan kag isa na diri ang hand, foot and mouth disease.
Suno kay Dr. Grace Tan, ang head sang environment and sanitation division sang City Health Office, nagalab-ot sa 60 ang reported cases ukon mga pasyente nga na-hospital bangud sang hand, foot and mouth disease humalin Enero 1 tubtob Hulyo 8.
Apang wala pa nadala sa sini nga numero ang mga out-patients ukon ang mga wala na-confine.
Suno kay Dr. Tan, sadto limitado lamang sa mga kabataan ang ini nga masakit apang ini sa karon ang nagadapo naman sa mga hamtong ang edad.
Ang HFMD isa ka makalalaton nga masakit nga sarang makuha paagi sa paghikap sa mga bitog-bitog sang isa ka pasyente.
Magluwas sa HFMD, nagadamo man ang natapikan sang kataro kag trangkaso kag subong man leptospirosis kun sa diin, humalin Enero 1 tubtob Hulyo 8, may walo na ka mga kaso sa ciudad sang Bacolod kun sa diin tatlo ang nagkalamatay.
