Tuman ang kalipay sang choreographer sa Bailes de Luces performance sang banwa sang La Castellana sa pagdaog sang grupo sa Panaad sa Negros Festival dance competition.
Sa interview sang Bombo Radyo Bacolod kay Jeric Conde Ricaplaza, kapin sa duha ka bulan ang ila preparasyon humalin sa pagpauli sang mga dancers sa Iloilo gikan sa ILOmination Philippine Light Festival.
Suno diri, sa performance nila sa Panaad may yara sila sang ginpakita nga lain naman kun sa diin gin-angot nila ang ila performance sa fantasy story sang bulkan Kanlaon.
Pahayag sini, mabudlay magsaot sang Bailes de Luces bangod indi lang pagsaot ang ila ginahimo apang sila ang dapat may koordinasyon sa pagggamit sang ila props sa pagswitch sang suga amo nga nagkinahanglan ang dancers sang disiplina kag presence of mind.
Sa karun, bilang champion sa Panaad sa Negros Festival dance competition sila ang magapreparar naman sang mas manami nga performance sa sunod nga tuig.
