Aminado ang pinuno sang Commission on Human Rights Negros Occidental nga dako ang bahin sang komisyon sa implementasyon sang Anti-Terrorism Act ukon RA11479.
Sa interview sang Bombo Radyo Bacolod kay CHR Negros Occidental Head Romeo Baldevarona, ginpahayag sini nga nadugangan ang ulubrahon sang talatapan bangud sa layi.
Ini ang pangapinan ang tawhanon nga kinamatarong sang mga Filipino kag mga dumuluong nga nagapuyo sa Pilipinas bangud transnational ang nasambit nga layi.
Ginpahayag man ni Baldevarona nga nagakinahanglan ang CHR sang dugang nga pondo para sa quick response sa pagbantay sang pagpatuman sang layi sang mga law enforcement agencies.
Madasig man nga magahimo sang tikang ang CHR sa tion nga may magpangayo sang bulig nga under surveillance bangud ginasuspetsuhan sang militar kag pulis nga naghimo sang terrorist act.
Nagapati man ini nga kinahanglan nga mag-umpisa sa pagtuon sa pagpatuman sang layi ang militar kag police agud mangin maayo kag produktibo ang resulta sang implementasyon sang layi.
Mas maayo man suno sa iya nga may layi nga kaangay sini bangud nasobrahan na ka enjoy sang kahilwayan ang mga tawo kag nagakalipat na magsunod sa layi.
Ginapasiguro man sini nga nakahanda man ang CHR sa pagpatuman sang kasuguan.
Ginpahayag man sini nga kinahanglan man nga ichallenge ang layi sa Korte Suprema agud makuha ang kahangawa kag duha-duha sang mga tawo kag mahatagan sang guidance ang law enforcement kag state forces.
Paagi man sa ruling sang supreme court sa ulihi, mas mapabakod kag maharness pa ang Anti-Terrorism Law 2020.
