Ginahangkat sang pinuno sang Commission on Human Rights Negros Occidental ang mga witness nga may ihabalo sa mga krimen nga nagluntad sa ciudad nga buligan ang mga kapulisan agud masolbar ang kaso.
Sa interview sang Bombo Radyo kay CHR Negros Occidental Head Romeo Baldevarona, ginpahayag sini nga indi manami nga ginpatay ang isa ka persona tapus ang pamilya daw wala man lang sang interes nga masolbar ang kaso bangud wala ang mga ini nagakooperar.
Suno kay Baldevarona, tuman ka makahangawa ang nagakatabo nga pagpangluthang sa ciudad kag maskin isa wala pa gihapon sang may nasolbar ang Bacolod City Police Office.
Suno diri, naga-effort man ang mga pulis apang kun wala sang kooperasyon sang witness kag pamilya sang biktima, mabudlay gid solbaron ang krimen.
Gindugang man sini nga dapat man nga maninguha ang gobyerno nga mahatagan sang proteksyon ang mga witness agud magpangisog ang mga ini nga maghatag sang statement.
Suno sa iya, daw wala lang ya nakahibalo sang sitwasyon ang mga local officials gani ginhangkat niya ini nga maghimo man sila sang tikang agud makumbinse ang mga testigo.
