Nagapadayon ang imbestigasyon sang Commission on Human Rights Negros Occidental tuhoy sa background sang Pamilya Fausto nga ginmassacre sa Sitio Kangkiling, Barangay Buenavista, Himamaylan City sang Hunyo 14 sang gab-i.
Suno kay CHR Negros Occidental chair Vincent Parra, nagpadulong sila sa Himamaylan City Police Station kag may nagkumpirmar nga ang iloy nga si Imelda Fausto ang tumandok sang Carol-an, Kabankalan samtang ang amay nga si Rolly Fausto ang nagikan naman sa Tayasan, Negros Oriental.
Suno sa iya, sila ang magapadulong pa sa nasambit nga mga lugar agud mahibaluan ang background sang mga biktima bangud sila ang may nabaton nga impormasyon nga nared-tag ang mga ini.
Magaistorya man ang CHR sa nabilin nga pamilya sang mga biktima agud ilaragway ang ila kabuhi sang sa Carol-an, Kabankalan City pa ang mga ini nagapuyo.
Samtang, aminado ini nga kalabanan sa mga gina-imbestigahan nila sa karun nga kaso amu ang mga bayolasyon sa right to life
Suno sa iya, antes pa man sa Pamilya Fausto, madamo na sang mga insidente sang pagpamatay kun sa diin wala pa naidentify ang mga suspetsado kag wala pa sang identities ang mga biktima.
May yara man sang mga nagkalamatay sa mga engkwentro ukon ginpatay sang mga New People’s Army.
Sa mga wala sang complainant nga mga kaso, may yara naman sang puder nga mag-imbestiga ang commission.
Samtang, sa bahin sang pagsolbar kag pagfile sang kaso, iya na ini jurisdiction sang law enforcement agencies.
