Ginwelcome sang Commission on Human Rights ang pagpabutyag sang suporta sang mga presidential candidates sa mandato sini sa pagpakigbato sa mga pagpang-abuso kag human rights violations.
Sa ikaduha nga round sang PiliPinas debate sang Commission on Elections, nagpanawagan ang mga presidential candidates sang empowerment sang CHR kag ginhatagan pagtamod ang inviolability sang tawhanon nga kinamatarong.
Suno sa CHR, sa nagliligad nga mga tinuig, naga-operate sila sa limited budget kag personnel, wala pa diri nadala ang mga gaps sa cooperation nagikan sa iban nga ahensya sang gobyerno, apang nagapadayon sila sa pagtuman sang ila mandato sa masarangan sang ila abilidad.
Sang Enero, gin-veto ni Presidente Rodrigo Duterte ang pagpatukod sang Human Rights Institute sang CHR sa P5.02-trillion national budget sini nga tuig.
Sang nagliligad nga tinuig, bilang pagbalos sa mga kritisismo sang CHR sa anti-drug war ni Duterte, pila ka mga mamalidha nga associated sa administrasyon ang nagpamahog man nga buhinan ang budget sang ahensya kag himuon P1,000 ukon hatagan ini sang zero budget.
Nagpabutyag sang paglaom ang commission nga ang mga pahayag sang mga presidential bets ang magapakita sang importansya sang pagmintinar sang tawhanon nga kinamatarong kag dignidad.
