Wala nagakomporme ang pinuno sang Commission on Human Rights Negros Occidental sa pahayag ni Mayor Evelio “Bing” Leonardia nga safe ukon luwas pa ang ciudad sang Bacolod.
Sa interview sang Bombo Radyo kay Romeo Baldevarona, wala ini nagapati nga safe ang Bacolod bangud sa mga sunod-sunod nga pagpamatay nga nagakalatabo sa ciudad.
Suno kay Baldevarona, apisar nga ginakonsiderar highly urbanized city ang Bacolod kag madamo sang award nga nabaton, wala ini sang pulos kun madamo man sang mga nagakalamatay nga mga pumuluyo.
Gani nagpanugyan ini sa mga otoridad kag opisyales nga ubrahon ang ila nga responsibilidad agud nga masolbar ang kaso.
Aminado ini nga madamo man sang mga tikang nga ginahimo ang mga kapulisan kag wala man ang mga ini nagapabaya apang suno sa iya, kinahanglan nga i-examine sang gobyerno ang witness protection program bangud ang mga saksi nga kuntani makabulig sa pagsolbar sang krimen ang nahadlok nga maghambal.
Gindugang man sang pinuno nga handa gid ang CHR Negros Occidental nga magbulig kun kinahanglanon.
