SINGAPORE—Nangin simple kag matawhay ang pagselebrar sang Paskwa sang mga taga-Singapore bangud sa ginapangatubang sa gihapon nga COVID-19 pandemic.
Sa interview sang Bombo Radyo Bacolod kay Bombo International Correspondent Mercy Saavedra Cacan direkta sa Singapore, ginpahayag sini nga wala sang social gatherings ukon naka-andan nga pagtipon-tipon subong nga Christmas sa amo nga pungsod kag nangin limitado lamang ini sa ila nga pamilya sa sulod sang balay.
Nahibaluan suno kay Cacan nga lima tubtob walo gid lamang ka mga persona ang ginatugutan nga mag-tipon sa Singapore.
Wala man sang countdown ukon fireworks display nga natabo kagab-i subong man sa New Year’s Eve agud nga malikawan ang social gathering.
Dugang pa sini nga padayon sa gihapon nga ginasunod sang mga overseas Filipino workers sa amo nga pungsod ang odd-even scheme kun magtipon sila sa isa ka shopping mall.
Padayon naman ang pagsuksok nila sang facemask bangud nga ang magalapas sa amo nga protocol ang pagamultahan sang 300 dollars.
Ginkumpirmar naman sini nga indi sila required magsuksok sang face shield kag wala naman sang barrier ukon one-seat apart sa mga transportasyon.
Samtang, ginpahayag naman ni Cacan nga posible magasugod na sa masunod nga semana ukon sa una nga semana sang Enero 2021 ang paghatag sang COVID-19 vaccine matapos mabaton sang Singapore ang una nga batch sang Pfizer vaccine.
Tinutuyo sang amo nga pungsod nga mabakunahan ang masobra 90% sang ila nga populasyon ilabi na subong nga may yara sang isa ka confirmed case sang bag-o nga strain sang COVID-19.
Ini ang isa ka 17-anyos nga babayi nga Singaporean kag naga-eskwela sa United Kingdom kag nagpauli sa Singapore sadtong Disyembre 6.
