Apisar nga yara sa evacuation centers subong nga Paskwa bangud sa paglupok sang Bulkan Kanlaon, nalipay man ang mga evacuees sa ciudad sang Bago matapos nga ang mga empleyado sang city government ang naghatag sa ila sang kalingawan.
Sa interview sang Bombo Radyo Bacolod kay Bago City Mayor Nicholas Yulo, may mga empleyado ang ciudad nga nagrupo sa apat kag nagpatigayon sang Christmas Party sa evacuation centers.
Ang kada grupo ang nag-adopt sang evacuation center kun sa diin nagdihon sang mga aktibidad para sa evacuees.
Suno kay Yulo, may yara sang mga giftpacks nga ginpreparar ang mga empleyado sang ciudad para sa mga evacuees.
Ginpahayag man sang alcalde nga may yara sang 500 ka mga evacuees nga nagapabilin sa lima ka evacuation center sang ciudad.
Aminado man ang alcalde nga masubo ang sitwasyon sang mga pumuluyo bangud wala ang mga ini sa tagsa ka panimalay agud nga magselebrar sang paskwa.
