Ginpahayag sang chief executive officer sang Metro Bacolod Chamber of Commerce and Industry, Inc. (MBCCI) nga subong nga Disyembre nagadoble ang pagcirculate sang kwarta sa ciudad sang Bacolod bangud sa mga bonuses nga nabaton sang mga empleyado.
Sa interview sang Bombo Radyo Bacolod kay Frank Carbon, ang mga empleyado ang nakabaton na sang 13th month pay samtang ang nagatrabaho naman sa gobyerno ang magluwas sa 13th month pay, may nabaton pa nga performance based bonus kun sa diin ginabakal sang ihanda para sa adlaw sang paskwa.
Suno kay Carbon, bangud sa mga bonuses nagadamo ang nagagwa agud nga magpamalaklon gani nagalibot ang kwarta kun sa diin dako nga bulig agud nga magmaayo ang dalagan sang ekonomiya sang ciudad.
Magluwas pa sini, madamo man ang nagapauli nga mga residente sang ciudad sang Bacolod nga nagatrabaho nagikan sa iban nga lugar agud nga magselebrar sang paskwa kaupod ang ila nga pamilya.
Suno kay Carbon, bangud sa mga nagpauli nga mga pumuluyo madamo ang makabenepisyo kaangay lamang sa mga Public Utility Vehicles, Jeep kasubong man ang mga tricycles bangud madamo na sila sang mga pasahero kag kahigayunan man nga makakakita sang dako nga revenue.
Ginpahayag man sini dako ang kinalain sang bulan sang Disyembre sang tuig 2021 kag 2022 bangud may pandemya pa sadtong tion kumparar subong nga tuig nga nagwa na ang tanan kag wala na sang restrictions.
