BACOLOD CITY-Nagpahanumdom ang pinuno sang Negros Occidental Police Provincial Office (NOPPO) sa mga kapulisan nga indi mag-imbolbar sa illegal nga mga buluhaton.
Ini kaangot sang pagkadakop kay Police Major Melvin Madrona, pinuno sang Criminal Investigation and Detection Group (CIDG)- Bacolod City bangud sa gina-alegar extortion sa sulod sang bulangan sa Purok Guanzon, Barangay Mansilingan ciudad sang Bacolod sang Pebrero 27.
Sa interview sang Bombo Radyo kay NOPPO Director Police Colonel Romeo Baleros, nagpanugyan ini sa mga pulis nga indi mag-ubra sang illegal nga mga buluhaton bangud makaguba ini sa imahe sang organisasyon.
Suno kay Baleros, kadako na sang sweldo nga ginabaton sang mga pulis gani wala sang rason nga mag-ubra pa ini sang indi maayo sa uta kaingod.
Nagpaandam man ini sa mga pulis nga naga-ubra sang indi maayo nga wala sang may maitago kag mahibaluan ina gihapon gani untatan na samtang timprano pa.
Naghingyo man ang director sa mga residente nga kun may yara sang nahibaluan nga pulis nga nagaubra sang indi maayo, indi magduha-duha nga ipadangat ini sa iya.
Ginkompirmar naman si Police Major Carmerlo Nermal, hepe sang Bacolod Police Station 7 wala nakahunong si Madrona apang yara ini sa ila nga kustodiya.
Suno sa iya, ginpasakaan na ini sang kaso nga Robbery Extortion kahapon upod ang sibilyan nga ginkilala kay alyas “Jay-R” kahapon.
Nagbayad naman sang P100,000 nga pyansa ang mga arestado para sa ila temporaryo nga kahilwayan apang may dugang nga P3,000 kay Madrona bangud sa pagbato sini samtang siya ang gina-aresto.
