Kapin 5,000 tubtob 10,000 ka mga drivers kag operators sang mga transport cooperatives ang magapakigbahin sa “unity walk” subong nga adlaw agud magpabutyag sang pagpamatok sa Senate resolution nga nagarekomendar sang suspension sang Public Utility Vehicles Modernization Program (PUVMP).
Ang mga grupo nga nagapabor sa PUVMP ang magatipon sa Mabuhay Welcome Rotunda sa Quezon City alas 6:00 sang aga kag magamartsa padulong sa Malacanang Palace.
Suno kay Ed Comia, convenor sang Kooperatiba at Korporasyon ng Alyansang Pilipino para sa Modernisasyon (AKKAP MO), magapatigayon man sang strikes sa nagkalain-lain nga bahin sang pungsod kaangay sang Cagayan de Oro kag Cebu.
Suno kay Melencio Vargas, presidente sang Alliance of Transport Operators and Drivers Association of the Philippines (ALTODAP), ang mga grupo nga pro-PUVMP ang wala nahatagan sang tiyansa nga maghambal sa Senate Hearing.
Suno diri, nagalain ang ila buot bangud daw kaangay nga ginpaboran pa ang 20 percent nga wala nagconsolidate samtang ang 80 porsyento ang wala ginpahambal.
Suno diri, sila ang nagsunod lamang sa gobyerno kag kun luyag kuntani sang mga ini nga ipa-untat ang programa, dapat ginpamatukan na ini sang tuig 2016 kag 2017 pa lamang.
Madumduman nga 22 sa 23 ka mga Senador ang nagperma sang isa ka resolusyon nga nagapanawagan sang temporaryo nga suspension sang PUVMP.
