Gin-athag sang city accountant sang Bacolod nga indi siya ang rason kun ngaa wala pa nahatag sa mga frontliners ang hazard pay tubtob subong.
Sa interview sang Bombo Radyo Bacolod kay Maria Corazon Cardel, ginpanindugan sini nga apisar ginpaidalom siya sa isolation matapos nga magpositibo sa COVID-19, may yara sang ginbutang nga officer-in-charge agud magbulos anay sa iya samtang wala pa nakabalik sa trabaho.
Suno diri, maproseso ang mga papeles para sa hazard pay bisan wala siya bangud may yara man sang OIC.
Ginalantaw man sini nga mahimo nagsala lang si Councilor Renecito Novero sa pagpahayag nga ang departmento ang gintunaan sang pagkadelay sang payroll sa hazard pay.
Nagpanindugan man si Cardel nga wala gid siya nagapugong sa pagrelease sang hazard pay bangud kinahanglan man niya ini bangud isa man siya sa mga empleyado nga nagakinahanglan.
Ginpahayag man sini nga may proseso nga pagaagyan antes marelease ang payroll kaangay sang Audit Department kag kinahanglan man nga mareview sini agud masiguro nga husto ang napirmahan bangud sarang siya nga makasuhan kun may sala.
