Ginklaro ni Bacolod City Administrator Atty Mark Mayo nga indi Job Order sang ciudad ang nadakpan nga utility worker sang isa ka elementary school sa drug buybust operation nga ginpatigayon sa Purok Masinulondon, Brgy. Punta Taytay, Bacolod City kahapon sang kaagahon.
Ang suspetsado ang ginkilala nga si Tisha Viajedor, 34 anyos, residente sa lugar, kag yara sa listahan sang Barangay Anti-Drug Abuse Council.
Nakuha sa iya paghinakop ang 11 ka sachet sang suspected shabu kalakip na ang buybust item.
Ang suspected shabu ang ginabanta nagabug-at sang 50 gramos nga may standard drug price nga P340,0000.
Pahayag ni Mayo nga si Viajedor ang JO gid man sang ciudad sang Marso tubtob Hunyo 2025.
Ini ang gin-endorso na “for retention.”
Apang pahanumdom sang city official nga sang tion nga ini ang nadakpan, wala pa mapirmahan ang iya appoitment.
Pasalig ni Mayo nga indi na batunon bilang JO ang suspect ilabi na nga sa pagpungko pa lamang ni Mayor Greg Gasataya sa pwesto, isa sa ya nangin focus ang pagpakigbato sa illegal nga droga paagi sa pagpanguna sa mandatory drug testing sa mga Capitol Employees.
