Ginalantaw sang Executive Director sa Bacolod City Emergency Operations Center (EOC) nga mahimo nga maka-issue na sang Vaccination Certificate para sa mga fully vaccinated individuals sa bulan sang Setyembre.
Paathag ni Bacolod City Administrator Em Ang, natapos na sang Department of Information and Communications Technology (DICT) ang program para sa QR coded record kag data sang mga fully vaccinated individuals.
Ginalantaw man sang opisyal nga sa masunod, magapagwa naman sang mandato ang National Inter-Agency Task Force nga indi na kinahanglan ang swabtesting kun may-ara na sang Vaccination Certificate.
Magamit man ini sa pagbyahe abroad sang mga overseas Filipino workers (OFW) kasubong man sa nagatabok-tabok sa lainlain nga isla para sa negosyo.
Paathag sini nga tuman ka gastos para sa mga negosyante nga may mga transaksyon kag negosyo nga kinahanglan sang dugay-dugay nga pagtabok kun sa kada byahe sang mga ini kinahanglan man nga magpaidalum sa RT-PCR testing.
Paathag pa ni Ang nga indi covered sa libre nga swab testing ang para sa travel purposes.
Gani panugyan sang City Administrator sa mga wala pa nakapabakuna nga magdesisyon na sa pagpabakuna.// Pasalig naman sini nga mahimo lang nga deretso makapadulong sa mga vaccination sites para walk-in nga magpabakuna basta nakarehistro na sa online registration.
