Nagahingyo ang city administrator sang Bacolod sa mga pumuluyo nga indi magpakampante apisar nga naganubo na ang kaso sang coronavirus sa ciudad subong man nga nangin manubo nga positivity rate sang surveillance testing nga ginpatigayon sa mga riders.
Sa interview sang Bombo Radyo kay City Administrator Em Ang, ginpahayag sini nga ang manubo nga positivity rate sang ginpatigayon nga surveillance testing ang wala nagapatimaan nga pahalugon na ang mga health protocols.
Suno kay Ang, bangud sa naganubo nga kaso sang COVID sa ciudad, mas kinahanglan pa nga maghalong agud mamintinar ang madutay nga infections.
Gindugang man sini nga ang masami nga nagadugang nga kaso kada adlaw ang mga close contact ukon mga locally stranded individuals.
Tuhoy naman sa mga inbound travel, suno sa city administrator, igapaidalum ang mga ini sa swab test kag ginaquarantine tubtob nga magwa ang resulta.
Kun positibo ang persona, ibutang ini sa quarantine facility samtang kun negatibo naman, papulion na ini apang kinahanglan gihapon kumpletuhon ang 14 days quarantine.
Suno diri, pagkatapos sang mga food delivery riders, ang mga frontliners, barangay health workers kag uniformed men naman ang ipaidalum sa surveillance testing.
Nagpanugyan man ini nga likawan lang anay ang paghiwat sang Christmas party agud malikawan man ang pagsaka sang kaso sa masunod nga tuig.
Suno kay Ang, hulaton na lang sa masunod nga tuig kun matawhay na ang tanan agud mas mangin masadya ang selebrasyon sang Paskwa.
