Tatlo ka mga resolusyon ang gin-aprubahan sa city council sang Victorias tuhoy sa naga-alingasaw kag indi maagwanta nga baho nagikan sa naula nga molasses nagikan sa Victorias Milling Company.
Suno kay Councilor Dino Acunia, chairman sang Committee on Environment Resources, Mayo 5 sang nag-awas ang kapin 3,000 metric tons sang molasses sa VMC kag nagsungaw ang bahi sini sang Mayo 16.
Suno sa iya, tubtob sa karun, masimhutan sa gihapon ang indi maayo nga baho sa onse ka mga barangay sa ciudad.
Sang Mayo 24, nagsapol ang mga city officials sang Victorias agud i-address ang reklamo batok sa VMC kag nag-aprubar sang tatlo ka mga resolusyon.
Una, ang pagpanawagan sa executive department nga mag-enforce sang memorandum of agreement sa VMC para sa rehabilitative action agud nga maaddress ang pag-awas sang molasses.
Ikaduha, ang paghingyo sa City Legal Office nga magpatigayon sang pagtuon kag rekomendasyon sang posible nga legal action kag remedies may kaangtanan sa insidente.
Kag ikatatlo, ang pagpangayo sang assistance sa Department of Environment and Natural Resources paagi sa environment bureau agud maaddress ang ini nga problema.
Suno diri, aside sa air pollution, halit man ini sa marine life gani nagpangayo man sila sang bulig sa City Legal Office agud mahibaluan kun ano ang violation sang VMC sa Water Act kag Clean Air Act.
