Kumpiskaron sang City Enforcement Unit Team sang ciudad sang Bacolod ang mga baboy nga ginlechon nga wala nakaagi sa slaughter house.
Suno kay City Legal Officer Atty. Romeo Carlos Ting Jr, pag-igo sadto sang African Swine Fever nga nagnubo ang numero sang backyard hog raisers sa ciudad kag amo nga nagakuha sang supply sa luwas sang ciudad, amo nga dapat gina-ihaw sa slaughter house ang baboy agud man masiguro nga malimpyo kag kalidad ang mabakal nga baboy sang konsumedor.
Suno diri, sa ginpatigayon nga monitoring sang Bacolod City Veterinary Office sa mga lechonan kag baligyaan sang karne sang baboy, ila natukiban ang pila ka mga nagabaligya sang lechon sa dalan Araneta, nga personal nga naga-ihaw sang baboy kag wala ginapadala sa slaughter house.
Sa karun luyag sang Bacolod City Veterinary Office nga tsekyaron ang tanan nga baboy nga dal-on sa lechonan kun ini may tatak kag papeles nga nag-agi ini sa slaughter house.
Nagahingyo sa karun ang City Legal Office nga dapat nga mag-agi sa slaughter house ang baboy nga ibaligya samtang sila ang magapadayon sa pagmonitor kag pag-inspect sa mga balaligyaan sang baboy kag lechon kaupod ang Business Permits and Licensing Office (BPLO), Bacolod City Veterinary Office , City Enforcement Unit Team kag kapulisan inkaso nga may kinagamo nga magluntad sa pagkumpiskar sa mga baboy.
Ang baboy nga naihaw nga wala nakaagi sa slaughter house ang iga-kumpiskar kag sunogon.
