Napilasan sa tiil ang city engineer sang Himamaylan, Negros Occidental matapos nga gintiro sa sulod mismo sang ila nga compound sa Road 1, Don Emillio Village Phase 1, Brgy 9, Kabankalan City kahapon sang hapon.
Sa interview sang Bombo Radyo kay Police Lt. Col. Alvimar Flores, hepe sang Kabankalan City Police Station, ginkilala ang biktima kay Engr. Vicente Genova, 54-anyos.
Santo sa imbestigasyon, yara sa gwa sang balay nagpwesto ang mga suspetsado nga nagasuksok sang helmet antes gintiro si Genova.
Nagalimpyo si Genova sang iya nga salakyan kag yara man ang iban nga miyembro sang iya pamilya sa sulod sang balay.
Sang naglaba si Genova sang trapo, nagpalapit ang duha ka mga lalaki kag nagpamangkot kun ang biktima amo si Engr. Genova.
Nagduda na si Genova gani wala ini nagsabat, apang sa ikaduha nga pagpamangkot, nagsabat ang biktima nga huo.
Diri na siya gintiro sang mga lalaki sang makatatlo ka beses.
Nakadalagan si Genova pasulod sa ila nga balay gani sa nawala nga tiil ini naigo.
Gilayon naman nga nagpalagyo ang mga suspetsado sakay sa ila nga motorsiklo.
Narecover sa crime scene ang empty shells sang caliber .45 pistol kag .9mm.
Sa karon, ginahibalo pa kun ano ang motibo sa krimen.
