Nag-abanse na ang city fire marshal sang Bacolod City Fire Station sa Stage III sang Search for Ten Outstanding Firefighters of the Philippines (TOFF) 2026.
Nagikan sa 119 ka mga applicants sa bilog nga pungsod, nalakip si Fire Supt. Jenny Mae Masip sa 58 ka mga nominees nga ginalakipan sang 26 ka commissioned officers kag 32 ka non-commissioned officers nga nag-abanse sa Stage III ukon National Finalists Selection Interviews nga natalana sa October 7-8.
Sa interview sang Bombo Radyo kay Masip, siya kag duha ka city fire marshal nagikan sa Negros Oriental ang gin-endorso sang BFP Negros Island Region sa central office bilang nominee apang siya ang mas maswerte nga nakaabanse sa next stage.
Sang Setyembre 1, nagpaidalom sanday Masip sa preliminary interview kun sa diin ginpamangkot sila angot sa achievements nga ila ginsubmit kag sang Setyembre 4, gin-anunsyar ang Top 58 nominees nagikan sa 119.
Sa October 8, magasabak naman si Masip sa second round sang interview nga mangin basehan sang Top 20.
Ang Top 20 ang iga-announce sa October 13.
Kun mapalaron nga makasulod sa Top 20, si Masip ang magapaidalom naman sa final interview sa November 7 para sa Top 10.
Ang Top 10 ang iga-anunsyar sa adlaw mismo sang awarding ceremony sa December 1, 2026.
Suno kay Masip, mabudlay ang mga pamangkot sang panel of judges apang nagasalig ini sa iya nga stored knowledge angot sa ila nga achievements sa Bacolod City Fire Station nga amo ang major criteria sa selection.
Suno sa iya, mas mabudlay ang interview diri sa TOFF sangsa interviews sa tion sang promotion apang nagapati ini nga masabat niya ang mga pamangkot bangud saulado niya ang ila accomplishments.
Nagpasalamat si Masip sa mga personnel sang Bacolod City Fire Station, sa city government sang Bacolod, iban nga ahensya sang gobyerno kag sa iya nga pamilya nga nagbulig agud nga malab-ot niya ang mga accomplishments.
