BACOLOD CITY-Maga-alokar sang pondo ang ciudad sang Bacolod agud ibakal sang mga kinahanglanon agud gilayon nga matapna ang 2019 novel coronavirus kag malikawan ang paglapta sini.
Sa interview sang Bombo Radyo Bacolod kay Mayor Evelio “Bing” Leonardia, ginpahayag sini nga magahalin ang pondo sa emergency fund sang City Disaster Risk Reduction and Management Office.
Magluwas diri, magatinguha man ang city government nga makapangita sang pondo nagikan sa national fund.
Suno sa alkalde, plano nila nga magbakal sang thermal scanner para sa mga eskwelahan sa ciudad.
Magabakal man sila sang mga face masks agud ipanghatag sa pumuluyo apang iprayoridad sang ciudad ang mga may yara sang respiratory problems nga mga tigulang kag mga kabataan nga naga-edad lima panubo.
Nahibaluan nga sang Biyernes, nagpagwa si Leonardia sang Executive Order No. 2-A nga nagamando sa pagtukod sang inter-agency task force against nCoV.
