Ginpaidalum sa lockdown ang City Hall building sang ciudad sang Kabankalan halin kahapon, Nobyembre 23 tubtob sa Miyerkules, Nobyembre 25 agud makapatigayon sang disinfection.
Madumduman nga isa ka assistant engineer ang nagtaliwan sang Nobyembre 15 bangud sa coronavirus disease.
Sa interview sang Bombo Radyo kay Kabankalan City Mayor Pedro Zayco, ginpahayag sini nga sa masobra 120 ka mga persona nga ginpaidalum sa swab test sang tinalikdan nga Biyernes lakip na ang mga nakaclose contact sang nagtaliwan nga assistant engineer, tatlo diri ang nagpositibo.
Suno kay Zayco, duha diri ang nagikan sa City Treasurer’s Office samtang isa naman ang nurse sa City Disaster Risk Reduction and Management Office (CDRRMO).
Sang nagligad nga semana, nagpositibo man sa COVID test ang pito ka mga empleyado sang City Engineer’s Office nga nakaclose contact man sang pasyente.
Bangud diri, ila ginkonsulta ang Department of the Interior and Local Government (DILG) kag gin-abisuhan man sila nga ipaidalum anay sa lockdown ang building para sa kaluwasan sang mga empleyado.
Suno sa alkalde, ang City Engineer’s Office kag City Treasurer’s Office lang ang sirado bangud ang iban nga mga departamento ang nahamtang sa sagwa sang City Hall building.
