Temporaryo nga ipaidalom sa lockdown ang bilog nga La Carlota City Hall sumugod subong nga adlaw tubtob sa Biyernes matapos magpositibo sa COVID-19 ang isa ka empleyado sang ciudad.
Ginapahayag nga isa sa mga executive assistant ni Mayor Rex Jalando-on ang nagpositibo sa coronavirus.
Bangud sini, nagpaidalom sa swab test ang alkalde pati na ang iya mga kaupdanan sa trabaho bangud masami nagalibot ang nagpositibo nga executive assistant.
Nahibaluan nga nagligad nga Martes ginpaidalom sa swab test ang amo ng empleyado kag sang Biyernes naggwa ang resulta sini nga positibo siya sa COVID-19.
Ginapahayag man nga nagikan sa ciudad sang Bacolod ang empleyado nga nagpositibo.
Gindisinfect na sang Sabado ang city hall kag liwat nga idisinfect subong nga adlaw.
Suspendido man ang trabaho sa city hall kag gin-abisuhan ang mga empleyado nga mag-isolate anay.
Sa karon padayon ang contact tracing sang ciudad sa iban pa nga naka-direct contact sa nagpositibo nga empleyado magluwas sa mga taga-city hall.
