Gin-aprubahan na Sangguniang Panlungsod ang request sa pagdeklarar sang State of Calamity sa Bacolod City bangod sa nagluntad nga lapnagon nga mga pagbaha tuga sang Hangin Habagat nga ginpabaskog pa sang bagyo Goring.
Ang Resolution No. 18 series of 2023, ang ginrekomendar sang Bacolod City Disaster Risk Reduction and Management Council (DRRMC) santo sa request ni Bacolod City Mayor Alfredo “Albee” Benitez, gani ini ang gilayon man nga ginpaboran sang SP.
Nahibaluan nga gikan sa 61 ka mga Barangay sa Bacolod City, 33 ka Barangay ang nahalitan sang mga pagbaha, kag iban sa mga ini ang nagfile naman sang request nga mapaidalum sa State of Calamity pinaagi sa ila tagsa ka Barangay DRRMC.
Sa nangin pagbaha humalin sang Lunes, nagdangat sa 3,998 ka pamilya ukon 12,868 ka mga indibidwal sa Bacolod City ang napilitan nga mag-evacuate.
Sa interview sang Bombo Radyo Bacolod kay Bacolod City Councilor Al Victor Espino, chairperson sang Committee on Laws and Ordinances sa Sangguniang Panglunsod, ila nga gin-aprubahan ang request agud magamit ang pondo sang lokal nga gobyerno para sa disaster kag mga kalamidad.
Ginpasalig sang konsehal nga kun matapos na ang mga proseso, ginalantaw sini nga magamit na ang mga pondo sa masunod nga semana para sa mga pagkaon, non-food items, medicine kag iban pa nga purposes may kaangtanan sa epekto sang mga pagbaha.
Paathag sini nga ang deklarasyon sang State of Calamity ang epektibo sa bug-os nga syudad indi lamang sa mga ginbahaan.
Ginatugyan naman sang mga ini sa Department of Social Services and Development (DSSD) ang pagkumpirmar kag pagvalidate sa mga nahalitan nga mga pumuluyo.
