Ginalantaw sang Executive Director sang Emergency Operation Center (EOC) sa syudad sang Bacolod nga makabahin ang edad lima tubtob onse anyos sa mga mabakunahan sa patigayunon nga ika-apat nga Bayanihan Bakunahan ukon National Vaccination Day sa Marso 10 tubtob 12.
Sa interview sang Bombo Radyo Bacolod kay Em Ang, ginpahayag sini nga wala naga-untat ang COVID-19 vaccination sa syudad sang Bacolod gani pasalig sini nga sila ang preparado na.
Sa National Vaccination Day, may-ara naman sang mga priority groups nga target mabakunahan.
Una na diri amo ang mga nakabatun na sang 1st dose kag namiss ang pagbatun sang 2nd dose.
Kasubong man ang mga senior citizen bangod aminado si Ang nga madamo pa sa populasyon sang mga katigulangan ang indi pa bakunado.
Samtang bilang preparasyon na sa pagbalik sang face-to-face classes, kasubong man nga prayoridad sa pagbakuna ang 12 tubtob 17 anyos nga mga estudyante.
Dugang pa ni Ang nga magluwas sa pagbalik sang in-person classes, ang mga kabataan ang ginapahanugutan naman sa paggwa.
Samtang target man sa tatlo ka adlaw nga Bayanihan Bakunahan ang pagtublok sang booster shot sa mga health workers kag mga nagatrabaho sa economic sector.
Suno kay Ang, ang mga mega vaccination centers sa mall ang magacater gihapon sang pagbakuna kadungan sa mga Resbakuna Center nga may natalana nga schedule sa pagbukas sa mga nasambit nga petsa.
Ginalantaw man ni Ang ang posibilidad nga makabahin ang pediatric vaccination sa mga edad lima tubtob onse anyos bangod nakaschedule na nga maga-abot ang 5,000 doses sang Pfizer vaccine nga formulated para sa mga kabataan subong nga adlaw.
Ang 5,000 doses ang sarang naman nga makacater sang 2,500 nga mga kabataan para na sa duha ka dose.
Panawagan ni Ang sa mga kabahin sa mga priority groups nga target mabakunahan nga I-take advantage kag I-avail ang vaccination program.
Sa karun ang syudad sang Bacolod ang may pinakamataas nga vaccination coverage sa bilog nga Western Visayas nga nagdangat na sa 140 percent gikan sa 70 porsyento nga target population.
