Handa na ang ciudad sang Bacolod para sa pagpatigayon sang Inasal Festival sa Mayo 26 tubtub 28 sa tatlo ka mga venues nga ginalakipan sang Upper East, Manokan Country kag North Capitol Road.
Ini ang una nga kahigayunan nga tatlo ka adlaw ang Inasal Festival sang Bacolod bangud sa nakaandan, isa lang ini ka adlaw.
Suno kay Bacolod City Councilor Celia Flor, chairperson sang committee on markets sa Sangguniang Panlungsod, ang opening sang festival ang patigayunon sa North Capitol Road nga pagasundan sang pagpares sang beer kag chicken inasal.
Ang Barangay Inasal Cook-Off naman sa Mayo 27 nga pasakupan sang mga barangay ang patigayunon sa Manokan Country kun sa diin hukman ang mga participants kun sin-o ang may pinakamanamit nga timpla.
Sa highlight sang festival, makit-an ang 320 metros nga grilling station ukon inasalan nga patigayunon sa Upper East.
Ini ang mas malaba sangsa 300 metros nga grilling station sang tinalikdan nga tuig.
Wala naman nag-imbitar ang ciudad sang national officials nga magatambong sa Inasal Festival.
Business as usual naman sa Manokan Country kun sa diin padayon ang grilling.
Apang may 1,600 ka chicken meat nga igahanda sang ciudad nga amo ang mabaton sang mga benepisyaryo kaangay sang yara sa Boys Home, Girls Home, Social Development Center, senior citizens, kag 500 ka mga pulis nga magabantay sang seguridad.
P1.5 million ang budget nga ginpain sang Bacolod City government para sa Inasal Festival.
Nagalaom naman ini nga madamo nga local tourists ang magabisita sa Bacolod kadungan sang festival.
