Ginpirmahan na ni Governor Eugenio Jose ‘Bong’ Lacson kagab-i ang Eexcutive Order 20-25, Series of 2020, may kaangtanan sa pagbutang sang bilog nga probinsya sang Negros Occidental sa idalom sang Modified General Community Quarantine (MGCQ) subong nga June 1, 2020.
Ini ang pagsunod sa direktiba ni Presidente Rodrigo Duterte kag Resolution No. 40 sang Inter-Agency Task Force on Emerging Infectious Diseases may kaangtanan sa pagpatuman sang MGCQ sa ila respective jurisdictions.
Suno sa gobernador, ang MGCQ ang nagsugod alas-12:00 sang kaagahon subong nga Hunyo 1 tubtub alas-11:59 sang gab-i sa Hunyo 15.
Ginapahanugutan naman ang indoor kag outdoor non-contact sports kag iban nga sahi sang exercise kaangay sang walking, jogging, running, niking, golf, swimming, tennis, badminton, equestrian kag skateboarding basta sundon lang ang minimum public health standards kaangay sang pagsuksok sang face masks kag maintenance sang social distancing protocols kag wala sang sharing sang equipment.
Ginapahanugutan naman ang mass gatherings kaangay sang religious activities and gatherings, movie screenings, concerts, sporting events, resort recreational activities kag iban nga entertainment activities, community assemblies kag non-essential work gatherings apang limitado lamang ini sa 50 percent sang venue ukon seating capacity.
Ang trabaho sa tanan nga public kag private officers ang magabalik naman sa full operating capacity kag sarang man ma-adopt ang alternative work arrangements sa mga persona nga naga-edad 60 pasaka, ang mga may immunodeficiency, comorbidity kag iban nga health risks kag mga babayi nga nagabusong.
Ang public utility buses ang sarang lamang nga makapasakay sang 50 porsyento sang maximum capacity sang salakyan magluwas sa driver kag conductor.
Ang mga pasahero naman ang indi pwede nga nagatuparay kag wala sang standing passengers.
Sa public utility naman, 50 porsyento lang ang sarang makasakay magluwas sa driver kag konduktor kag isa lamang ka pasahero ang sarang makasakay sa front seat.
Sa UV express naman, maximum nga duha ka pasahero ang sarang nga makapungko sa isa ka row kag isa lang ang sarang makasakay sa front row.
Sa shuttle service naman, 50 porsyento naman sang maximum capacity sini ang sarang makasakay kag isa lang ka pasahero ang makasakay sa front row kun wala sang konduktor.
Isa naman ka pasahero ang ginapahanugutan sa sidecar sang tricycle kag wala sang dapat nga makasakay sa likod sang driver.
Nakabutang man diri nga ang makasulod sa Negros Occidental amo lamang ang mga locally-stranded individuals, returning Negrenses kag essential workers sang mga establisyimento.
Ang numero naman sang makasulod diri sa probinsya ang igabase sa RT-PCR testing capacity sang Molecular Laboratory sang Teresita Lopez Jalandoni Provincial Hospital nga ginalakipan sang 3, 000 ka mga pasahero nga nagalabay sa airport kada semana kag 1, 000 passengers nga magalabay sa tanan nga mga seaports kada semana.
Ang tanan nga mga pasahero ang kinahanglan nga magpaidalom sa RT-PCR testing antes sila makabiya sa airport.
Sila ang nagakadapat man nga magpaidalom sa home quarantine tubtub makagwa ang resulta sang RT-PCR test nga nagapakita nga sila ang negatibo sa coronavirus disease.
