Pila ka mga probinsya kag ciudad nga una na gin-characterize bilang low-risk areas ang ginpaidalom sa modified general community quarantine kalakip na ang ciudad sang Bacolod kag probinsya sang Negros Occidental.
Sa media briefing nga ginpatigayon sa Malakanyang kaina sang aga, gin-anunsyar ni Presidential Spokesperson Harry Roque nga tanan nga mga areas sa Pilipinas ang yara sa gihapon sa idalom sang quarantine bangud ang nauna nga mga areas nga gin-anunsyar nga wala na sa community quarantine ang ginbalik sa idalom sang modifief GCQ.
Madumduman nga kahapon, gin-anunsyar ni Roque nga ang mga lugar nga nacharacterize nga low risk ang indi na pag-ipaidalom sa community quarantine sugod sa Mayo 16.
Ang mga lugar nga ipaidalom sa modified GCQ ang ginalakipan sang Ilocos Norte, Ilocos Sur, La Union, Pangasinan, Dagupan City sa Region I; Marinduque, Occidental Mindoro, Oriental Mindoro, Romblon, Palawan, Puerto Princesa City sa Region 4-B; kag Albay, Camarines Norte, Camarines Sur, Catanduanes, Masbate, Sorsogon, Legazpi City, Naga City sa Region 5.
Yara man sa MGCQ ang Aklan, Antique, Capiz, Guimaras, Iloilo, Negros Occidental, Iloilo City, Bacolod City sa Region 6; kag Biliran, Eastern Samar, Leyte, Northern Samar, Western Samar, Southern Leyte, Ormoc City, Tacloban City sa Region 8.
Balik man sa MGCQ ang Bukidnon, Camiguin, Lanao del Norte, Misamis Occidental, Misamis Oriental, Cagayan de Oro City sa Region 10; North Cotabato, South Cotabato, Sarangani, Sultan Kudarat, General Santos City sa Region 12; kag Basilan, Lanao del Sur, Maguindanao, Sulu, Tawi-Tawi, Cotabato City sa BARMM.
Sa idalom sang modified GCQ, ang movement ang mas relaxed na kag pahanugutan naman ang mga empleyado nga magbalik sa non-essential jobs samtang nagapractice sang sang minimum health standards kaangay sang pagsuksok sang face mask sa pampubliko nga lugar, mag-obserbar sang physical distancing kag masami gid nga maghugas sang kamot kag magdisinfect.
Suno kay DILG Secretary Eduardo Año, madamo ang mga alkalde kag gobernador nga nagrequest sa iya nga indi pagbawion gilayon ang GCQ kundi amat-amaton lang ang pagbalik sa new normal.
