Magapabilin sa General Community Quarantine with Heightened Restriction ang syudad sang Bacolod humalin sa Setyembre 1 tubtob 7, 2021.
Ini ang ginkumpirmar ni Presidential Spokesperson Harry Roque.
Sa interview sang Bombo Radyo Bacolod kay Bacolod City Administrator Em Ang, Executive Director sa Emergency Operations Center (EOC), ginkumpirmar sini nga magapabilin sa GCQ-HR ang risk qualification sang syudad tubtob sa Setyembre 7 apisar nga nagnubo na ang kaso kag nagnubo man ang healthcare utilization rate.
Ginalantaw ni Ang nga ang quarantine classification ang bangod sa delta variant nga nadetect.
Ginakabig nya naman ini nga preventive measure agud indi magsaka ang kaso sang COVID-19 sa syudad.
Ginpakigbahin man sang City Administrator nga wala gihapon ginapahanugutan ang mass gatherings kasubong man ginalimitahan ang pagpatigayon sang mga aktibidad sa open air kag enclosed places bangod wala man sang pagbag-o ang status.
Ginapakamaayo naman ni Ang nga nakaandan na sang mga pumuluyo ang mga pagsulundan sa nasambit nga quarantine status kag nagapati ini nga mas safe ang Bacolod City kun indi anay magpanaog sa mas manubo nga community quarantine status.
Ilabi na suno diri nga matag-as gihapon ang mga kaso sa mga kaingod nga mga lugar kaangay sang Cebu, Panay kag Metro Manila nga masami nagatabok man sa Bacolod.
Nagapati si Ang nga kun indi hugot ang pagpatuman sa mga borders, magasaka man ang kaso sa syudad nga magatuga man sang pagsaka sang quarantine status nga makapabudlay pa sang pagpangabuhi sang tanan nga Bacolodnon.
