Ginkumpirmar ni Bacolod City Administrator Em Ang nga ginapahanugutan na ang ciudad nga makasugod sa pagbakuna sang mga pumuluyo nga napaidalum sa A4 kag A5 categories.
Sa interview sang Bombo Radyo kay Ang, ginpahayag sini nga may permiso kag clearance na nagikan sa national government ang Bacolod City nga makavaccinate sang mga persona nga napaidalum sa A4 kag A5 categories matapos ini nalakip sa NCR Plus ukon mga lugar nga yara sa sagwa sang Metro Manila nga prayoridad sa vaccination.
Suno sa iya, ang napaidalum sa nasambit nga mga kategorya amu ang mga economic frontliners, mga nagatrabaho sa essential industries, ang mga line of work nga nagaatubang sa madamo nga mga kliyente kag mga uniformed personnel.
Suno diri, magadepende pa ini sa availability sang supply sang bakuna.
Gindugang man sang city administrator nga santo sa abiso sang national government, apisar nga sarang na nga mabakunahan ang A4 kag A5 categories, kun may yara sang mag-abot nga napaidalum sa A1, A2 kag A3 ukon mga healthcare workers, senior citizens ukon persons with comorbidities, sila ang dapat nga hatagan sang prayoridad.
Sa karun nagdangat na sa 11,047 ang fully vaccinated sa Bacolod samtang 53,466 naman ang nakabaton sang first dose sa kabug-usan nga 624,987 nga populasyon.
