Nagpatigayon sang Pre-Disaster Readiness Assessment (PDRA) Emergency Preparedness meeting ang city government kaupod ang Bacolod City Disaster Risk Reduction Management Office, mga punong barangay sa syudad sang Bacolod kag personnel sang National Disaster Risk Reduction and Management Council (NDRRMC) agud nga diskusyunan ang preparasyon sa pagsulod sa Philippine Area of Responsibilitysang Super Typhoon Mawar kag pagatawgon nga Betty sa tion nga makasulod na sa PAR.
Sa interview sang Bombo Radyo Bacolod kay Bacolod City Disaster Risk Reduction Management Office Head, Dr. Anna Maria Laarni Pornan, nagpatigayon na sila sang zoom meeting kaupod ang concerned government offices kasubong man face to face meeting kaupod si Bacolod City Mayor Alfredo Benitez, Bacolod City Vice Mayor El Cid Familiaran kag mga department heads sa syudad sang Bacolod gud nga hambal ang preparasyon sa ginalantaw nga pagsulod sang nasambit nga bagyo.
Suno kay Pornan, sa ginpatigayon nga Pre-Disaster Readiness Assessment (PDRA) Emergency Preparedness meeting, ginapahibalo ang mga pumuluyo sa syudad sang current situation paagi sa mga punong barangay kag ginapapreparar ang mga ini agud makahibalo na sang himuon sa tion nga magsulod ang bagyo.
Kabahin sang preparasyon ang paghatag sang mga food packs sa mga barangay, equipments, kasubong man mga tawo ingkaso nga may yara sang patigayunon nga pre-emptive evacuation.
Samtang, ginpreparar man sang Bacolod City Disaster Risk Reduction Management Office ang ila nga mga logistics kasubong man ang mga pagkaon kag kun ano pa ang available.
Suno kay Pornan, ginpatsekyar man sini ang mga evacuation centers kun sa diin identified na sang syudad kag ginapahanda na ini kag indi na magtinudluanay pa sa tion nga kinahanglan.
Ginatutukan man sang pamunuan sang Bacolod City Disaster Risk Reduction Management Office ang weather forecasts 24/7 agud nga mamonitor ang hulag sang Bagyong Mawar.
Ginpahayag man sini nga kabahin man sang preparasyon ang pagdeclogging sang drainage kag mga kanal agud matalunsay ang pag-ilig sang tubig sa tion maginulan dala sang bagyo kag naghingyo man ini sa mga pumuluyo nga tinluan man ang mga kanal nga yara sa ila lugar agud nga mapahagan-hagan ang tsansa sang pagbaha.
Nagpanugyan man ini sa mga pumuluyo ilabi na ang yara nahamtang sa flood prone areas nga mag-aligmat kag mag-evacuate na kun makita nga kinahanglanon para sa ila nga safety.
