Isa ka resolusyon ang gin-aprubahan sang Sangguniang Panlungsod sang Bacolod nga nagahigyo sang clarification nagikan sa Inter-Agency Task Force kag sa Department of Health may kaangtanan sa quarantine procedure para sa mga returning overseas Filipino workers kag non-OFWs.
Nahibaluan nga padayon ang pag-inabot sang mga OFWs sa ciudad kasunod sang mandu ni Presidente Rodrigo Duterte nga nationwide mass repatriation program para sa 24 mil ka mga OFWs nga nastranded sa Metro Manila bangud sa community quarantine.
Ang resolusyon nga gin-author ni Councilor Renecito Novero ang gin-aprubahan sa regular session sang City Council kahapon.
Sa interview sang Bombo Radyo kay Novero, ang Bacolod City ang ginpaidalom sa enhanced community quarantine sang Marso 27 tubtub Mayo 15 samtang ginpaidalom naman ini sa general community quarantine halin sang Mayo 16 tubtub Mayo 31.
Sa nasambit nga period, madamo sang mga OFWs kag non-OFWs nga nagpalauli.
Suno sa konsehal, luyag sang ciudad nga klaruhon ang mga health protocols may kaangtanan sa quarantine requirements para sa mga OFWs kag non-OFWs.
Ang mga returnees suno sa iya ang ginpaidalom sa mandatory quarantine kag mandatory reverse transcription polymerase chain reaction (RT-PCR) ukon swab test sa ila ginhalinan nga lugar kag liwat naman nga gina-swab test kag gina-quarantine pag-abot sa Bacolod.
Suno diri, namangkot sila sa IATF kag sa DOH kun ang returnee nga nagnegatibo na sa RT-PCR test kag naka-quarantine sang 14 ka adlaw ang kinahanglan pa nga ipaidalom sa test kag quarantine pag-abot sa LGU of origin.
Nagpamangkot man ang ciudad kun sarang mapanubuan ang quarantine period para sa mga returnees kun sila ang negatibo sa RT-PCR test sa ila ginhalinan.
