Ginpahayag sang election officer sa syudad sang Bacolod nga wala sang dapat kahangaw-an ang mga Bacolodnon apisar nga ginpaidalom sa yellow category sang Regional Joint Security Control Center (RJSCC) ang syudad bangud sa intense political rivalry.
Sa interview sang Bombo Radyo Bacolod kay Atty Revo Sorbito, para sa iya natural lamang ang political rivalry apang wala ini sang nakita nga may natabo nga insidente agud nga ipaidalom ang syudad sa yellow category.
Suno kay Sorbito, santo sa monitoring sang COMELEC-Bacolod matawhay ang pagpangampanya sang duha ka partido sa Bacolod City.
Pahayag sini nga kun siya lamang ang masunod, ibutang sini sa category green ang syudad bangud malinong man ang Bacolod City samtang nagapadayon ang campaign period sang lokal nga mga opisyales.
Samtang nagpanugyan man ini sang mga kandidato nga siguruhon nga safe kag matawhay kasubong man nga ginasunod ang minimum health protocols sa tion sang pagpangampanya.
