Nagpatigayon ang ciudad sang Bago sang second round sang mass testing subong nga adlaw.
Sa interview sang Bombo Radyo Bacolod kay Bago City Mayor Nicholas Yulo, target nila ang masobra 300 ka mga tawo sa second round sang mass testing.
Gincoordinate man nila ini sa provincial health office kag ang mass testing ang bunga man sang contact tracing sang mga confirmed positive cases nga mga residente sang syudad.
Target nga mga barangay sa ginpatigayon nga mass testing amo ang Barangay Balingasag, Lag-asan, Sampinit, Poblacion, Dulao, Busay, Caridad, Atipuluan, Abuanan, Binubuhan kag Mailum.
Suno kay Yulo, ginsabat sang probinsya ang mga swab kits kag laboratory apang ang mga med techs nga nagpatigayon sang swabbing ang ginprovide sang syudad kasubong man ang pagkaon sang frontliners.
Suno sa alkalde, ang mapaidalom sa swab test ang mahome quarantine kag dal-on lang sila sa quarantine facility kun magpositibo.
Samtang, nagapasalamat man ini nga nagakooperar ang mga residente sang Barangay Ma-ao, Bago City santo man sa weekly report sang Local Inter-Agency Task Force against Covid sang syudad.
Madumduman nga ginpaidalom ang Barangay Ma-ao, Bago City sa lockdown bangud sa madamo nga nagpositibo sa COVID-19.
