Nagapakig-unong ang alkalde sa ciudad sang Cadiz sa pamilya ni Loreta Alacre, ang caregiver nga caregiver sa Israel nga gin-abduct sang Hamas militants sang Sabado.
Sa interview sang Bombo Radyo Bacolod kay Cadiz City Mayor Salvador “Bading” Escalante, lantawon sang ciudad kun ano ang bulig nga mahatag sa pamilya Alacre magluwas sa bulig nga ihatag sang Overseas Workers Welfare Administration (OWWA).
Suno kay Escalante, masubo nga kapalaran ang natabo kay Loreta Alacre, isa ka residente sang ciudad sang Cadiz, nga nagpadulong sa luwas sang pungsod agud nga magtrabaho agud nga mahatagan sang maayo nga bwas damlag ang ila pamilya.
Suno kay Escalante, kaupod sang nalisdan nga pamilya ang bug-os nga ciudad sang Cadiz ang nagapangamuyo para sa kalag ni Lorie.
Suno kay Escalante, ang pamilya Alacre ang isa ka disente nga pamilya sa ciudad sang Cadiz.
Suno sa alkalde, nahibaluan sini nga single si Lorie kag breadwinner sa pamilya kun sa diin ini ang nagapaeskwela sa iya mga hinablos.
Palangga man ang caregiver employer kag wala nagpauli bisan sang pandemic bangud safe man ang sitwasyon sini sa Israel.
Antes pa man natabo ang pag-abduct kay Lorie, nag-attend pa ini sang music festival kaupod ang mga abyan sini bangud nakaday-off sang Biyernes kag Sabado.
Suno kay Escalante, indi man kinahanglan magpamatay agud nga ipahayag ang panindugan sang isa ka tawo, sa relihiyon man ukon iban nga bagay.
Panugyan man sini sa pamilya kag sa tanan nga Overseas Filipino Workers (OFW) nga magpangamuyo agud makita ang mga sabat sa tanan nga palamangkutanon.
Nagapanawagan man ini sa mga residente sang Cadiz City nga yara sa Israel nga magpahibalo man sa ciudad agud nga mamonitor man ang kahimtangan sang mga ini.
Magapatigayon man sang city mourning ang ciudad sang Cadiz bilang pag-upod sa kalisod sang pamilya Alacre.
Nagpasalig man ang gobernador sang probinsya sang Negros Occidental nga magahatag sila sang bulig sa kutob sang masarangan para sa pamilya ni Loreta Alacre.
Suno kay Governor Eugenio Jose “Bong” Lacson, ang importante sa karun nga madala pabalik sa ciudad sang Cadiz ang bangkay ni Lorie.
Suno kay Lacson, obligasyon sang probinsya nga maghatag sang bulig sa publiko gani magahatag ang mga ini sang nagakaigo nga bulig agud nga mapabalik sa Pilipinas ang bangkay ni Lorie kag mahatagan man sang bulig ang pamilya sini.
Ginpahayag man sang gobernador nga ang national government ang wala man nagakulang sa paghimo sang tikang agud nga mabuligan ang mga Overseas Filipino Workers nga naipit sa giyera sang Israel kag Palestine.
