Magapatuman sang Cocolisap Checkpoint sa duha ka Barangay sa ciudad sang La Carlota.
Ini kasunod sang pagduging sang Cocolisap nga kaangay sang tigi nga masami nagahalit sa mga lubi.
Sa tion nga matapikan sang mga insekto, ang dahon, paklang ukon bunga sang lubi ang amat-amat nga nagayellow kag nagakalaya tubtob nga mapatay ang lubi.
Sa interview sang Bombo Radyo Bacolod kay La Carlota City Mayor Rex Jalando-on, ginatrain na sa karun sang personnel sang Philippine Coconut Authority (PCA) ang mga barangay tanod kag officials sang Barangay San Miguel kag Ara-al nga amo ang magapatuman sang Cocolisap checkpoint sumugod sa Sabado.
Suno kay Jalando-on ang checkpoint ang patigayunon agud indi mapanaog ang mga produkto sang lubi.
Apang paathag sang alkalde nga kun lahing nga lubi ang produkto, mas maayo nga kaguron na ngadaan dira pa lamang sa Barangay samtang amo man kun butong ang produkto.
Samtang dumilian naman ang pagpanaog sang mismo nga bunga sang lubi bangod ini ang mahimo natapikan sang Cocolisap nga makahatag sang risgo kun maglapta sa iban nga mga barangay, banwa kag ciudad.
May laboratoryo man nga gintukod ang PCA sa ciudad kun sa diin sila ang nagasagod sang insekto nga magaserbe pangontra sa Cocolisap.
