Ginkumpirmar sang hepe sang Talisay City Police Station nga duha ka semana na nga nagapatigayon ang ciudad sang mass testing kada Martes kag Huwebes.
Sa interview sang Bombo Radyo kay Police Major Jigger Gimeno, ginpahayag sini nga bangud sa kahangawa sang mga pumuluyo nga mainfect sang COVID-19, nadesisyunan sang local government unit kag mga health officials nga magpatigayon sang massive mass testing kada Martes kag Huwebes kag duha ka semana na ini nga ginaimplementar.
Suno kay Gimeno, ang mga ginapaidalum sa mass testing amu ang mga nakaclose contact sang mga positibo nga kaso subong man ang mga irefer sang mga opisyales sang barangay nga may ginabatyag nga sintomas sang virus agud timprano pa nga mahatagan sang pagbulong.
Suno diri, tinutuyo sang City Health Office kag LGU nga makita sang mga pumuluyo ang realidad nahanungod sa virus kag matapna ini as early as possible.
Gindugang man sang hepe nga nakarecover na ang duha ka mga personnel mga nagpositibo sa COVID-19.
Suno sa iya, ang personnel nga una nga nagpositibo ang nakagwa na sa quarantine facility sang nagligad nga semana kag sa karun, ginatapos na lang ang iya quarantine period.
Nakarecover naman, suno kay Gimeno ang ikaduha nga personnel bangud asymptomatic ini kag nakabalik na sa trabaho sang Sabado.
Sa karun, may yara na sang 487 ka mga kaso sang COVID-19 sa Talisay City matapos madugangan sang 18 ka pasyente kahapon.
Sa nasambit nga numero, 285 diri ang nag-alayo, 188 ang aktibo, samtang 14 naman ang nagkalamatay.
