Hugot ang pagbantay sang Talisay agud indi makasulod sa ciudad ang baboy nagikan sa iban nga banwa kag ciudad diri sa probinsya nga mahimo infected sang hog cholera ukon African Swine Fever.
Walo tanan ka checkpoints sa point of entries nagikan sa Bacolod padulong sa Talisay ang ginbutang sa Barangay Zone 15; Circumferential Road sa Barangay Zone 15; Barangay Concepcion; Barangay Cabatangan; samtang ang nagikan nagikan sa Silay padulong Talisay, may yara sang checkpoint sa Barangay Zone 16; Barangay Bubog; Barangay Efigenio Lizares; kag Barangay Dos Hermanas.
Suno kay Jimmy Bombaga Sr., provincial chairman sang Citizen Crime Watch of Negros Occidental kag isa sa mga miyembro sang team nga nagabantay sa Barangay Zone 16, Talisay City, sang Huwebes, Mayo 25, nagsugod ang ASF checkpoint sa dulunan sang Bacolod kag ciudad sang Talisay.
Aminado ini nga nabudlayan sila sa una nga adlaw sang checkpoint bangud namag-o pa ang mga tawo nga gina-inspect ang ila nga karga.
Suno diri, dapat kumpleto ang papeles sang nagatransport sang lechon nga ginalakipan sang authority to transport, business permit, kag certification nagikan sa Municipal ukon City Veterinary Office nga indi apektado sang hog cholera ang gin-ihaw nga baboy.
Kun wala sang nasambit nga mga papeles, ginapabalik nalang ang nagatransport sini.
Suno kay Bombaga, may pila na ka nagtransport sang lechon nagikan sa Barangay Singcang Airport nga ila ginpabalik bangud wala sang dala nga papeles.
Suno diri, wala sang makalusot sa Talisay nga indi maglabay sa checkpoint bangud may nagabantay sa walo tanan ka lulutsan kag may nagabantay diri adlaw kag gab-i.
