Nagpatigayon sang Civil Disturbance Management Operation kag Medical Response Training ang pila ka mga katapo sang kapulisan may kaangtanan sa eleksyon kag mahimo paglupok sang Bulkan Kanlaon.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, ang training ang ginpangunahan sang pinuno sang Provincial Learning Doctrine and Development.
Kalakip sa nagpartisipar ang duha ka opisyal kag 48 ka mga non-commissioned officers gikan sa 1st and 2nd Negros Occidental Mobile Force Company.
Samtang may kaangtanan sa campaign period, ginapakamaayo ni Catalogo nga wala sang may narecord nga election-related incidents sa mga areas nga involved sa pagbisita ni President Ferdinand “Bongbong” Marcos Jr. kalakip na ang La Carlota, Victorias kag Talisay City.
Samtang walo naman ka banwa kag pito ka ciudad ang madinalag-on nga nakatapos sa peace covenant signing.
Nagalaom si Catalogo nga antes paman ang pag-umpisa local campaign period sa Marso 28, natapos na ang peace covenant signing sa mga nabilin nga banwa kag ciudad.
Nakita naman sang NOCPPO nga positibo ang pagbatun sang mga kandidato kag aspirants sa inisyatibo.
Sila ang gina-updan man sang Philippine Army, Philippine Coast Guard kag iban pa nga ahensya.
Nagalaom si Catalogo nga mapabilin nga malinong ang probinsya tubtob matapos ang May 12 National and Local Elections.
