Ginpahayag sang pinuno sang Bacolod Traffic Authority Office (BTAO) nga ginahulat pa nila ang bag-o nga Memorandum of Agreement (MOA) gikan sa city government para sa padayon nga pagoperate sang Metro Towing Services sa ciudad.
Inis matapos nga ginpahayag sang anay konsehal sa ciudad nga natapos na ang MOA sa tunga sang ciudad kag nasambit nga pribado nga kumpaniya.
Sa interview sang Bombo Radyo Bacolod kay Patrick Leonard Lacson, magapagwa ini sang memorandum subong nga aga nga nasanto sa advise sang city legal office kag ini ang temporaryo nga pagpauntat sang operasyon sang Metro Towing Services kasunod sang ginpahayag ni Former Bacolod City Councilor Archie Baribar nga natapos na ang MOA sa tunga sang ciudad kag nasambit nga kumpaniya.
Suno kay Lacson, ang BTAO ang implementing body lang man gani kun ano ang advise sang alkalde, opisina sang alkalde, city legal office ukon city council ang ila lang man ginapatuman.
Apang suno diri, verbally nagabiso si Bacolod City Mayor Alfredo Benitez nga padayunon lamang ang ginahimo nga towing sang mga salakyan nga nagaillegal parking sa ciudad.
Ginpahayag ni Lacson nga ginreview niya ang MOA kag ginalantaw nila ni Bacolod City Legal Officer Atty Carlos Ting nga ang towing lamang ang paresibuhan sa Metro Towing Services samtang ang clamping, ang ciudad ang maresibo apang ibutang lamang nga ang BTAO ang nagahulam sang clamp sa nasambit nga kumpaniya.
Apang sa karun magaestorya siya sa city legal office kun ano ang maayo nga himuon kun ipatuman bala ang gin-instruct sang alkalde nga ipadayon lamang ang towing apisar nga expired ang MOA ukon hulaton gid nga magwa ang MOA.
Suno kay Lacson, matuman lamang sila sang ginmando sa ila ilabi na nga ang BTAO ang yara sa idalom sang supervision sang alkalde sang ciudad.
