Umpisa na subong nga adlaw ang implementasyon sang clamping and towing ordinance sa dalan Lacson sa syudad sang Bacolod.
Madumduman nga una na nga nakapatigayon sang dry run ang Bacolod City Government sa nagkalainlain nga bahin sang syudad kun sa diin may pila na nga salakyan ang ginclamp bangod sa pagbayolar sa No Parking Zone regulation.
Apang ang inisyal nga implementasyon ang nagaserbe lamang nga warning para sa mga motorista, kabahin sa information dissemination sang Bacolod Traffic Authority Office (BTAO).
Ang clamping kag towing sa dalan Lacson ang maga-umpisa alas-7:00 sa aga tubtob alas-7:00 sa gab-i.
Tinutuyo sang ordinansa nga mapahagan-hagan ang mabug-at nga trapiko kun sa diin ini ang una nga ipatuman sa Lacson Street, kag sa tion nga makita nga maayo ang resulta sang programa, sunod naman nga ipatuman ang clamping and towing sa dalan Araneta.
Karun nga nagasaulog sang Masskara Festival 2023, isa man sa venue amo ang Lacson Street.
Apang ang mga programa sa area kalakip na ang road closure ang maga-umpisa pa nga ipatuman sa Oktobre 16.
Sa pihak nga bahin, ginpahayag man ni Bacolod City Mayor Alfredo “Albee” Benitez, nga ipatuman man ang towing sa mga festival sites, apang pahanumdom sini nga deretso na nga itow ang mga salakyan nga magapark sa indi husto nga lugar kag indi na iclamp.
Ini bangod kun magpatigayon pa sang clamping, magatinir pa ang salakyan sa indi husto nga lugar nga makapagutok sang trapiko, apang gilayon naman nga mahawanan ang area kun itow ang mga salawayon nga motorista.
Nahibaluan nga ang towing track ang magagikan na sa pribado nga kompanya, nga magaserbe nga 3rd party kag amo man ang maga-arrange sang lugar kun sa diin iga-impound ang mga madakpan nga salakyan.
Samtang ang BTAO naman amo ang magapangdakop kag magaticket sa mga motorista.
