Wala pa ginbatak ang class suspension sa Barangay Sag-Ang, La Castellana, Negros Occidental bangud wala pa sang clearance nagikan sa Philippine Army bangud sa nagluntad nga engkwentro sa tunga sang rebelde nga grupo kag tropa sang gobyerno.
Sa interview sang Bombo Radyo Bacolod kay La Castellana Mayor Alme Rhummyla G. Nicor-Mangilimutan, nagapabilin nga suspended ang klase kag ginahulat pa nila ang clearance nagikan sa Philippine Army agud nga makabalik sa pageskwela ang mga estudyante.
Suno kay Mangilimutan, nagpatigayon na sila sang meeting kaupod ang katapo sang Philippine Army, Philippine National Police, DSWD kag kaupod ang barangay kag nagpanghatag man ang Local Government Unit sang foodpacks sa mga evacuees kag mga pamilya nga yara sa kaingod nga lugar sang encounter site.
Suno sa alkalde sa tion nga clear na ang lugar pagabatakon man sini ang class suspension kag makabalik naman ang nagevacuate nga mga residente.
Nagpanawagan man ini sang bulig nagikan sa mga pumuluyo nga magkooperar agud nga maestablisyar ang peace and order sa banwa sang La Castellana bangud dako ang kabahin sang mga ini paglab-ot sang nasambit nga tinutuyo.
