BACOLOD CITY — Shocked man gihapon ang mga abyan ni Major Harim Gonzaga sa Negros Occidental may kaangtanan sa iya kamatayon sa sulod sang Malacañang Park, Martes sang aga.
Si Gonzaga ang tumandok sang Barangay 1, Kabankalan City, Negros Occidental kag diri man siya nag-eskwela sang elementarya kag high school apang nagsaylo ini sa Antique sang kolehiyo.
Sa exclusive interview sang Bombo Radyo Bacolod sa malapit nga abyan ni Gonzaga nga si Engr. Mikoy Cornel, tumandok sang Barangay Camugao, Kabankalan City, indi man gihapon sila makapati nga patay na ang Presidential Security Group (PSG) member sa huben nga edad.
Base sa iya nga pagkakilala sa suldado, indi sini masarangan nga nag-suicide pinaagi sa pagtiro sa iya kaugalingon.
Ginpaambit ni Cornel nga bisan simple lang nga estudyante si Gonzaga sadto, indi man ini secretive bangud palawakal man ini nga sahi sang abyan ilabi na kun sila ang magkaupod.
Tubtub sa karun suno iya, ang anay classmate man gihapon nila ang ila ginaistoryahann kag nagalaom sila nga mangin patas ang imbestigasyon agud maggwa ang kamatuoran.
Si Gonzaga ang na-assign man sang una sa nagkalain-lain nga bahin sang pungsod antes nangin kabahin sang PSG.
Siya ang nasapwan sang iya misis nga si Shiela nga wala na sang kabuhi kag may pilas tuga sang pagkaluthang sa nawala nga dughan sa sulod sang PSG quarters sa Malacañang Park.
