Patay ang isa ka lalaki matapos nakuryente samtang nagapangtinlo sang isa ka building sa dalan Galo-Lacson, Bacolod City kaina sang aga.
Ginkilala ang biktima kay Saner Perez, 41-anyos kag residente sang Barangay 28.
Sa interview sang Bombo Radyo Bacolod kay Ernie Perez, amay sang biktima kag kaupod sa obra, ginpahayag sini nga nagapangkiskis kag nagapanglimpyo sila sang building sang hinali lang nga natandugan sang iya bata ang live wire.
Suno kay Ernie, nahambalan naman niya ang iya nga bata kag iban pa nga mga upod sa obra nga maghalong kag likawan ang live wire.
Nahibaluan nga pito na sila ka adlaw nga nagapanglimpyo sa amo nga building kun sa diin isa ka bangko ang sa idalom nga bahin sini.
Ginhingagaw pa nga gindala sa opsital ang biktima apang wala na gid matabangan pa.
