Nagapadayon pa ang cleansing sang National Electrification Administration sa masterlist sang mga member-consumers sang Central Negros Electric Cooperative nga makapakigbahin sa plebisito para sa joint venture agreement upod ang PrimElectric.
Nahibaluan nga ginsuspend ang plebisito agud nga malimpyuhan ang listahan sang sarang makaboto kag makakas ang ngalan sang nagtaliwan na.
Sa interview sang Bombo Radyo kay CENECO acting general manager Atty. Arnel Lapore, mahimo nga magalawig sang duha ka semana antes matapos ang cleansing.
Aminado si Lapore nga concern sang pila ka grupo ang pila ka mga empleyado nga mahimo magsabotahe sa listahan apang naghatag na siya sang warning sa mga empleyado nga magkooperar kag magsuporta sa proseso.
Wala pa man naistoryahan ang threshold sang mga botante kundi ginatugyan na sa ini sa information technology people sang NEA.
Suno kay Lapore, ang team sang NEA ang magadeterminar sang threshold kun matapos na ang cleansing sang listahan.
Nahibaluan nga dapat makakuha ang YES sang 50 percent sang boto plus one agud nga madayon ang JVA, apang suno kay Lapore, ang NEA na ang magadeterminar kun paano kuhaon ang threshold kag ini ang ila nga hulaton.
